ભારતીય ક્રિકેટ બોર્ડે આ વર્ષે ભારતમાં ટી-20 વર્લ્ડ કપની યજમાની અંગે ચર્ચા કરવા માટે 29 મેના રોજ એસજીએમની બેઠક બોલાવી છે. સૂત્રએ મંગળવારે સમાચાર એજન્સીને જાણ કરી હતી. વાસ્તવમાં બીસીસીઆઇએ 29 મેના રોજ એક બેઠક બોલાવી છે કારણ કે આઇસીસીની બેઠક 1 જૂને થવાની છે. આ વર્ષે ઓક્ટોબર-નવેમ્બરમાં ભારતમાં ટી-20 વર્લ્ડ કપ યોજાવાનો છે. આ અંગે બેઠક મહત્વની માનવામાં આવે છે. સૂત્રના જણાવ્યા અનુસાર બીસીસીઆઇ કોરોનાની પરિસ્થિતિનો તાગ મેળવવા માટે આઇસીસીની બેઠક પહેલા પોતાની એક બેઠક યોજવા માંગે છે જેથી ટી-20 વર્લ્ડ કપના આયોજનમાં કોઈ અવરોધ ન આવે.બીસીસીઆઈએ પસંદ કરેલા શહેરોના નામ બેઠકમાં ફરી એકવાર ધ્યાનમાં લેવામાં આવશે. આ બેઠકમાં આ શહેરોમાં કોરોનાની સ્થિતિ અંગે ચર્ચા કરવામાં આવશે. એસજીએમ ( સામાન્ય સભા ) બેઠકમાં ટી-20 વર્લ્ડ કપ અંગે ચર્ચા કરવા ઉપરાંત આંતરરાષ્ટ્રીય કેલેન્ડર, મહિલા ક્રિકેટ પર ચર્ચા કરવામાં આવશે. બીસીસીઆઈએ ટી-20 વર્લ્ડ કપ માટે નવ શહેરોની પસંદગી કરી છે, જેમાં અમદાવાદ, બેંગલુરુ, ચેન્નાઈ, દિલ્હી, ધર્મશાળા, હૈદરાબાદ, કોલકાતા, લખનઉ અને મુંબઈનો સમાવેશ થાય છે. આઇસીસી હવે ભારતમાં કોરોનાની સ્થિતિને ધ્યાનમાં રાખીને ટુર્નામેન્ટ માટે આ સ્થળોની પસંદગી કરશે. ઓક્ટોબર થી નવેમ્બર વચ્ચેની સૂચિત ટુર્નામેન્ટમાં આ વર્ષે ૧૬ દેશોનો સમાવેશ થાય છે. જો બધુ બરાબર રહેશે તો ટુર્નામેન્ટની અંતિમ મેચ 13 નવેમ્બરે અમદાવાદમાં રમાશે.
ભારતીય ક્રિકેટ બોર્ડ આ વર્ષે ભારતમાં યોજાનારા આઇસીસી ટી-20 વર્લ્ડ કપની યજમાની માટે પ્રતિબદ્ધ છે. ગયા મહિને શરૂ થયેલી ઈન્ડિયન પ્રીમિયર લીગની 14મી સિઝનની મધ્યમાં ટુર્નામેન્ટ મુલતવી રાખવામાં આવ્યા બાદ તેને મુલતવી રાખવામાં આવી રહી છે તે અંગે બોર્ડ પર પ્રશ્નો ઉભા થઈ રહ્યા છે. આ વખતે કોરોના મહામારી વચ્ચે આઇપીએલ નું સંચાલન કરવામાં આવી રહ્યું હતું પરંતુ ખેલાડીઓ બાયો બબલમાં ચેપ ગ્રસ્ત મળી આવ્યા બાદ અધવચ્ચે જ તેને રોકવાનો નિર્ણય કરવો પડ્યો હતો.
