ખેલ મહાકુંભ-3.0 માં ભાગ લેવા માંગતા મોરબીના રમતવીરો 5 થી 25 ડિસે. સુધી રજિસ્ટ્રેશન કરાવી શકશે

ગ્રામ્યથી રાજ્યકક્ષાની વિવિધ સ્પર્ધામાં ભાગ લેવા https://khelmahakumbh.gujarat.gov.In પર ઓનલાઈન રજિસ્ટ્રેશન કરવાનું રહેશે

સ્પોર્ટ્સ ઓથોરીટી ઓફ્ ગુજરાત દ્વારા દર વર્ષેની જેમ ચાલુ વર્ષે ખેલમહાકુંભ 3.0 નું આયોજન હાથ ધરવામાં આવનાર છે. જેમાં શાળા/ ગ્રામ્ય, તાલુકા/ ઝોન કક્ષા, જિલ્લા/ મહાનગરપાલિકા કક્ષા, ઝોન કક્ષા(ટીમ રમત) અને છેલ્લે રાજ્યકક્ષાની સ્પર્ધા માટેનું આયોજન કરવામાં આવ્યું છે. ખેલ મહાકુંભ 3.0 અંતર્ગત શાળા કક્ષાએ અંડર-૯, અંડર -૧૧, અંડર -૧૪ અને અંડર -૧૭ ની વયજૂથમાં ખેલ મહાકુંભની એથ્લેટીક્સ રમતમાં તમામ શાળાઓએ ફરજીયાત ભાગ લેવાનો રહેશે .

ખેલ મહાકુંભ 3.0 નું ઓનલાઈન રજીસ્ટેશન તા :- ૦૫-૧૨-૨૦૨૪ થી શરૂ કરવામાં આવનાર છે, જેની છેલ્લી તા :- ૨૫-૧૨-૨૦૨૪ રહેશે. ખેલ મહાકુંભ 3.0 મા ભાગ લેવા માટે નિયત વયજૂથ તમામ ખેલાડીઓ દ્વારા ફરજીયાત વેબ સાઈટ https://khelmahakumbh.gujarat.gov.In પર ઓનલાઈન રજિસ્ટ્રેશન કરવાનું રહેશે. પ્રત્યેક ખેલાડી મહત્તમ બે રમતમાં જ ભાગ લઇ શકશે.

 અંડર-૯, અંડર -૧૧ , અંડર -૧૪ અને અંડર -૧૭ ગ્રુપમાં શાળામાં અભ્યાસ કરતા ખેલાડીઓએ જે તે શાળામાંથી રજિસ્ટ્રેશન કરવાનું ફરજીયાત રહેશે. કોલેજમાં અભ્યાસ કરતા ખેલાડીઓ ઓનલાઈન અથવા કોલેજ મારફતે રજિસ્ટ્રેશન કરી શકશે. કોઈ પણ શૈક્ષણિક સંસ્થામાં અભ્યાસ ન કરતા હોય તેવા ખેલાડીઓ જિલ્લાની જિલ્લા રમત પ્રશિક્ષણ કેન્દ્ર પરથી પોતાના વયજૂથમાં રજિસ્ટ્રેશન કરવવાનું રહેશે તેવું જિલ્લા રમત વિકાસ અધિકારીની યાદીમાં જણાવાયું છે.