મહારાષ્ટ્રના ગઢચિરૌલીમાં ગુરુવારે પોલીસ સાથેની અથડામણમાં બે નક્સલવાદીઓ માર્યા ગયા હતા. ગઢચિરૌલીના પોલીસ અધિક્ષક અંકિત ગોયલના જણાવ્યા અનુસાર આ એન્કાઉન્ટર ધનોરા તહસીલના જંગલમાં થયું હતું. ગોયલે જણાવ્યું હતું કે, ગઢચિરોલી જિલ્લાના ધનોરા તહસીલ જંગલમાં મહારાષ્ટ્ર પોલીસના સી-60 યુનિટ સાથેની અથડામણમાં બે નક્સલવાદીઓ માર્યા ગયા હતા. અંકિત ગોયલે જણાવ્યું હતું કે, ઘટનાસ્થળેથી મોટી માત્રામાં સામગ્રી જપ્ત કરવામાં આવી છે. આવી જ એક ઘટના ૨૮ એપ્રિલે બની હતી જ્યારે અહીં પોલીસ સાથેની અથડામણમાં બે નક્સલવાદીઓ માર્યા ગયા હતા. પોલીસ આ કેસની તપાસ કરી રહી છે. માર્યા ગયેલા નક્સલીઓની ઓળખ હજુ સુધી થઈ શકી નથી.
ઉલ્લેખનીય છે કે એપ્રિલ 2018માં મહારાષ્ટ્રના ગઢચિરૌલી જિલ્લામાં નક્સલીઓ સામે મોટું ઓપરેશન શરૂ કરવામાં આવ્યું હતું. જેમાં પોલીસે ૧૪ નક્સલવાદીઓની હત્યા કરીને મોટી સફળતા મેળવી હતી. પોલીસ ઓપરેશનમાં નક્સલ નેતા સાઈનાથ અને સિનુ પણ માર્યા ગયા હતા. ગઢચિરૌલી જિલ્લાના ઇટાપલ્લીના બોરિયા જંગલ વિસ્તારમાં મહારાષ્ટ્ર પોલીસ અને નક્સલવાદીઓ વચ્ચેના એન્કાઉન્ટરમાં નક્સલીઓ માર્યા ગયા હતા. માનવામાં આવે છે કે આ વર્ષે અત્યાર સુધી નક્સલવાદીઓ સામે આ સૌથી મોટું ઓપરેશન છે. આ પહેલા માર્ચમાં છત્તીસગઢમાં 10 નક્સલવાદીઓ માર્યા ગયા હતા. તેમાંથી છ મહિલા કમાન્ડર હતી.
ગઢચિરૌલીમાં સુરક્ષા દળોના જવાનો ઉપરાંત સ્થાનિકોને પણ નક્સલવાદીઓ નિશાન બનાવે છે. મહારાષ્ટ્ર પોલીસ રાજ્યના આ નક્સલ પ્રભાવિત વિસ્તારોમાં કાર્યરત નક્સલવાદીઓ સામે ઝુંબેશ ચલાવી રહી હતી. આ વિસ્તારમાં ગ્રામજનો અને નક્સલવાદીઓ વચ્ચે અવારનવાર અથડામણના અહેવાલો આવતા હોવાથી પોલીસ દ્વારા આ વિસ્તારમાંથી નક્સલીઓને સાફ કરવા માટે ઓપરેશન શરૂ કરવામાં આવ્યું હતું. દેશમાં અગાઉની તુલનામાં નક્સલવાદી પ્રવૃત્તિઓમાં ઘટાડો જોવા મળ્યો છે. નક્સલ પ્રભાવિત દેશના 126 જિલ્લાઓમાંથી સરકારે 44 જિલ્લાઓને નક્સલ મુક્ત વિસ્તારો જાહેર કર્યા છે. જોકે નક્સલ પ્રભાવિત વિસ્તારોમાં આઠ નવા જિલ્લાઓનો પણ સમાવેશ કરવામાં આવ્યો છે. સૌથી વધુ નક્સલ પ્રભાવિત જિલ્લાઓની સંખ્યા ૩૫ થી ઘટીને ૩૦ થઈ ગઈ છે.
